Meydadka Labo nin oo dhalinyaro ah ayaa waabarigii saaka laga helay Guri ku yaal Degmada Dharkeenley, kuwaasoo sida la sheegay ay gowracnaayeen.

Labadan Nin ayaa ahaa kuwo ilaalo ka hayay Guriga, waxaana lagu soo waramayaa in xalay gudaha loogu galay gurigii ay degenaayeen, deetana la bireeyay sida ay ku warameen dadka deegaanka.

Waxaa saaka isugu soo baxay dhacdadan dadweyne aad u fara badan oo deegaanka ah, kuwaasoo xaalad naxdin iyo murugo ku tilmaamay falka lagula kacay labadaas dhalinyaro oo jirkooda aan ka muuqan haba yaraatee wax rasaas ah, marka laga reebo gowrac ka muuqata qoortooda.

Lama oga cida ka dambeysa dilka labadan nin iyo sababta la dilay, laakiin dadka deegaanka ayaa isla dhex maraya hadalo kala duwan, waxaana goobta meydkooda markii dambe soo gaaray ehelada ragaas oo qaatay Meydkooda si ay u aasaan