Waaxda Badaha Aduunka ayaa sheegtay in Maraakiib dagaal ay u direen Saddex Markab oo shalay iyo Xalay Kooxaha Burcad badeedka Soomaaliya ku afduubteen Xeebaha gacanka cadmeed.

Saddexdan Markab ayaa sida wararku sheegayaan laga leeyahay Dalalka Japan, Iiraan iyo Jarmalka oo saacado isku dhow ay afduubteen Kooxaha Burcad badeedka ah ee ka qowleysata Xeebaha Soomaaliya.

Kooxahan oo wata Doomo dheereeya, kuna hubeysan hubka noocyadiisa kala duwan ayaa rasaas la dhacay Maraakiibta, ka hor inta aysan afduuban, waxaana ay ula soo dhaqaaqeen Xeebaha Soomaaliya.

Maraakiibta shisheeye ee dhex meereysta Xeebaha Soomaaliya ayaa u muuqda kuwo u caal la' wax ka qabashada Kooxaha Burcad badeedka, oo iyagu malaayiin doolar ka qaata Maraakiibta ay afduubtaan.

Xeebaha Degmada Eyl ee Maamul Goboleedka Puntland ayaa la soo sheegayaa in saddexda Markab lala soo galay, waxaana iyana ku soo daba jira Maraakiibta ee quwadaha shisheeye leeyihiin.

Bilihii u dambeeyay waxaa sii batay afduubka maraakiibta shisheeye, waxaana todobaadyo ka hor ay aheyd markii Markab kuwa dalxiiska oo ay saarnaayeen Lamanayaal Jarmal ah la afduubtay, kuwaasoo markii dambe lagu sii daayay lacag Madax furasho ah