Xildhibaanada Baarlamaanka ee doonayay in la rido Xukuumada Ra'iisul Wasaare Nuur Cadde oo shalay ka bad baaday Mooshinka ayaa ku tilmaamay codeyntii shalay ay kalsoonida ku heshay Baarlamaanka mid u dhacday qaab aan sharci aheyn.

Dhowr Xildhibaano oo ahaa kuwii waday Mooshinka ayaa ku eedeeyay Gudoomiyaha Baarlamaanka inuu siduu doono u jiheeyo howlaha baarlamaanka, isla markaana uu hareer maro Axdiga Kmg ah.

Xildhibaan C/qaadir Nuur Caraale ayaa sheegay in qaabkii ay shalay u dhacday codeynta mooshinka laga keenay Ra'iisul Wasaaraha ay aheyd mid aan sharci aheyn, isla markaana Gudoonka Baarlamaanka aanu u maamulin hab cadaalad ah.

Sidoo kale Xildhibaanadii laga adkaaday sida Mowliid Macaani iyo Cali Cabdulaahi Cosoble ayaa iyaguna sheegay in waxa ka dhacay fadhiga baarlamaanka uu yahay kuwo aan ka dhicin fadhiyada Baarlamaanka Caalamka, waxayna sheegeen in Gudoonka Baarlamaanka uu qalad ku kacay sida ay yiraahdeen.

Mooshinkii ay wadeen Tiro Xildhibaano ah ayaa noqday sida tusbax go'ay oo kale, iyadoona Xukuumada Nuur Cadde ay usuura gashay inay si buuxda u hesho codka kalsoonida, taasoo ay howlaheeda ku sii wadan karto muddo lix bilood oo kale, waxaase la ogeyn sida laga yeelayo Dawcada hortaala Baarlamaanka ee ka dhanka ah Madaxweynaha