Inkastoo waabarigii saaka ay deganeyd Xaalada Magaalada Muqdisho, hadana waxay wax walba is badaleen wixii ka dambeeyay 11-kii Barqanimo ee maanta, waxaana meelo ka mid ah Magaalada is qabsaday Hugunka Madaafiicda iyo kuwa fud fudud.

Dagaaladan ayaa ka socda meelo ka mid ah Magaalada Muqdisho, taasoo keentay in dad aad u fara badan ay walaac la soo darsaan, iyagoo ka baqdin qaba saameynta Madaafiicda la is weydaarsanayo.

Dagaal ayaa daqiiqado ka hor ka qarxay Isgoyska Florenca ee Degmada Wardhiigley, kaasoo ah kii ugu xooganaa ee aagaas ka dhaco mudooyinkan, waxaana dagaalka uu yimid markii Xoogaga Hubeysan ay weerar gaadmo ah ku soo qaadeen Ciidamada Dowladda ee halkaas fariisinka ku leh.

Madaafiicda xoogan ayaa bilaabatay Suuqa Bakaaraha, iyadoona Madaafiicda ay yihiin kuwo laga ridayo Xarunta Madaxtooyada oo fariisin u ah Ciidamada Dowladda iyo kuwa Ethiopia.

Ilaa Labo Madfac ayaa ku habsatay Suuqa Bakaaraha agagaarka Shirkada Isgaarsiinta Hormuud, waxaana la arkayaa qiic iyo uuro oo ka baxeysa gudaha Suuqa Bakaaraha.

Wixii warar ah ee ku soo kordha kala soco wararkeena dambe